Tensionet mes Republikës Islamike të Iranit dhe fuqive kryesore evropiane janë përshkallëzuar ndjeshëm pasditen e sotme. Ministria e Jashtme e Iranit ka thirrur në një takim urgjent të dërguarit diplomatikë të katër vendeve kryesore evropiane: Italisë, Francës, Gjermanisë dhe Britanisë së Madhe.

Lëvizja vjen si një reagim i ashpër i Teheranit ndaj qëndrimeve që këto shtete kanë mbajtur së fundmi në lidhje me valën e protestave që ka përfshirë vendin.

Sipas deklaratës zyrtare të Ministrisë së Jashtme iraniane, të transmetuar edhe nga televizioni shtetëror, ambasadorëve dhe të ngarkuarve me punë iu shpreh “keqardhja e thellë” dhe protesta e Teheranit për atë që regjimi e cilëson si ndërhyrje në punët e brendshme.

Gjatë takimit, diplomatëve evropianë iu shfaqën materiale video që, sipas autoriteteve iraniane, dokumentonin dëmet e shkaktuara nga ata që Teherani zyrtar i etiketon si “rebelë” dhe jo protestues paqësorë.

Ultimatumi i Teheranit

Mesazhi i përcjellë nga zyrtarët iranianë për qeveritë e Romës, Parisit, Berlinit dhe Londrës ishte i drejtpërdrejtë.

“Qeveritë tuaja duhet të tërheqin deklaratat e tyre zyrtare në mbështetje të protestuesve,”, mësohet t’u jetë komunikuar diplomatëve, duke i bërë thirrje Perëndimit të ndalojë së legjitimuari aktet që Irani i konsideron të dhunshme.

Konfirmimi nga Parisi

Lajmi është verifikuar edhe nga burimet diplomatike evropiane. Ministria e Jashtme Franceze, në një reagim për agjencitë e lajmeve, pranoi zhvillimin e takimit.

“Ne konfirmojmë thirrjen e ambasadorëve evropianë në Ministrinë e Jashtme në Teheran,”, njoftoi Parisi zyrtar, pa dhënë detaje të mëtejshme mbi përgjigjen që diplomatët kanë dhënë gjatë ballafaqimit.

/rtsh.al/